Read more



  پیڑ دا بوٹا:   ء1975 وچ تنویر بخاری ہوراں دا غزلاں دا مجموعہ"پیڑ دا بوٹا"چھپیا،پر ایہدا ٹائٹل نہ چھپ سکیا۔ایہدا سائز30*20/16سی تے صفحے64۔ایہدی کتابت وی تنویر بخاری ہوراں آپے ای کیتی سی کتاب دا انتساب"بسمل"ہوراں دے ناں سی۔

نمونہ:  "پیڑ دا بوٹا"وچوں کجھ شعر حاضرنیں:


مورتاں، نظماں تے غزلاں، سفنے لارے، سدھراں 

جس کھڈاؤنے نال ورچی، زندگی ورچا لئی

(٭)

اس بندے نے بھل کے وی نہیں ایس گلی چوں لنگھنا

کیہدے لئی بوہے تے لکھ کے ناں دی تختی لاواں 

(٭)

مریاں اکھیاں وچوں کوئی نام نہ اوہدا پڑھ لے

چٹے دن جہے بھیت نوں کالی عینک ہیٹھ لکاواں 

(٭)

دل نوں ٹھاہراں دین دی خاطر"ہپی" بنیا بھرنا واں 

"ماڈل"بنن دے چاء وچ توں وی اپنا روپ گوایا اے

(٭)

بوہے باریاں ڈھو کے ایویں اندر تڑیا بیٹھا اے

میلہ اجڑن والا اے، کوئی خبر اوہنوں اپڑائے

(٭)

"شاہی مسجد" توں دکھن دے رستے دنیا پے گئی اے

بوہڑو او لک ٹنوں ٹنوں، میں لکھاں ترلے پائے نیں 

(٭)

وڈے ویلے دا کمرے وچ بیٹھا اکھیاں بھیواں 

چاہ دے دسویں کپ اندر وی ڈبا نہیں ادریواں 

(٭)

پاہرو جثیاں دے بے سرتی اندر گٹوں ہوئے

چوراں نے بے فکریاں ہو کے اک اک کُلی لُٹی

(٭)

آہو لاہے نیں جیون دے، لیراں کیتائے گلماں 

کجھ نہ کجھ تے کرنا ای سی، تیرے آون تائیں 

(٭)

دل تے دکھ دی دھپ پئی لشکے، اکھوں ورھدیاں کنیاں 

گدڑ گدڑی دا ویاہ خورے! کدن مکنائے حالی

(٭)