Read more


 حضور دے حضور  ﷺ پنجابی دا پہلا نعتیہ قصیدہ 

قصیدہ: 
قصیدہ لفظ قصید توں اے جہدے معنے نہیں ارادہ شاعری دی اصطلاح درج قصیدہ اوس نظم نوں آکھیا جاندا اے جیدے وچ کے دی شوبھا (مدح) یاں نندیا (ہجو) بیان کیتی جادے۔ قصیدے دے پہلے شعر نوں مطلع کے آخری شعر نوں جہدے وچ شاعر دا تخلص ہوندا اے مقطع کہندے نیں۔ جیکر قصیدے دے زیادہ مطلع ہوون تاں اوہ ذو المطالع قصیدہ سدیندااے۔
قصیدہ پندراں دیہاں شعراں دا ہو سکدا اے تے دو تن شعراں دا دی پنجابی وچ را قم نے پنج سو شعراں دانعتہ قصیدہ آکھیا اے ایہدے شعراں دی تعداد مقرر نہیں۔ یاد رہوے کہ سارے ای شعرا کو ردیف قافیے وچ ہوندے نیں۔
 قصیدے دیاں کئی قسماں ہوندیاں نہیں جویں:
حمد یہ قصیدہ: جہدے وچ اللہ تعالی دی حمد بیان کیتی جاوے۔

حمدیہ قصیدہ: جہدے وچ کے ولی اللہ یاں بادشاہ دی صفت کیتی جاوے۔ 
مدحیہ قصیدہ: جہدے وچ کسے ولی اللہ یاں بادشاہ دی صفت کیتی جاوے ایہنوں منقبتیہ وی 
کہندے نیں۔
نعتیہ قصیدہ: جیدے وچ رسول اللہ دی نعت بیان کیتی جاوے۔
فخریہ قصیدہ: جیدے وچ شاعر اپنی ای وڈیائی بیان کرے۔
ہجویہ قصیدہ: جیدے وچ کے دی نندیا تے بد مفتی کیتی جاوے۔
عام طور سے لفظ قصیدہ مدحیہ قصیدے دے معنیاں وچ ای ورتیا جاندا اے۔ شہدائے کر بلاء دی صفت شنا والی نظم نوں وی عام طور تے قصیدہ ای کہندے نیں۔ قصیدے واسطے کوئی خاص وزن یاں بحر مقرر نہیں۔ ایہ ہر مناسب بحر وچ آکھیا جا سکدا اے۔
قصیدے دے خاص حصے:
قصیدے نوں دو حیاں وچ ونڈیا جاندا اے۔
1 تمہیدیہ 
2 خطابیہ
(1) تمہیدیہ:
ایہدے وچ اصل مدح یاں ہجو توں پہلاں کچھ شعر تمہید (مڈھ بنھن لئی) دے طور تے آکھے جاندے نیں۔ ایہناں نوں تشبیب یاں تمہید آکھیا جاندا اے۔
آپ ﷺ ہوراں دے زمانے وچ شاعر نعتیہ قصیدے لکھنے شروع ہوئے، حضرت حسان بن ثابت تے حضرت کعب بن زہیر ہوراں آپ ﷺ دی شان وچ قصیدے لکھے۔ جیہڑی امام بصیری ہوراں دے قصیدے ”قصیدہ بردہ شریف“ نوں عزت تے مان ملیا اوہ مان عزت کسے ہور دے حصے وچ نہیں۔ قصیدہ بردہ شریف دے ترجمے تے سیّد سبط الحسن ضیغم ہوراں نیں بھرواں کم کیتا اے۔ 
جہناں پنجابی وچ قصیدے دے ترجمے کیتے سیّد سبط الحسن ضیغم، مجموعہ تراجم قصیدہ بردہ شریف، مرتب سبدالحسن ضیغم، 2002ء وچ انج لکھدے نیں
سیّد وارث شاہ 1
حافظ بر خوردار 
3 خواجہ غلام مرتضیٰ قلعہ والے
4 ممد عزیز الدین
5 سیّد نیک عالم
6 جان محمد 
7 محمد شاہ
8 محمد سعید 
9 احمد یار مرالوی
10  میر احمد نواز خان
11  مولانا نبی بخش حلوائی 
12  ڈاکٹر مہر عبدالحق
13  ڈاکٹر احمد حسین قلعداری
14  پروفیسر اسیر عابد
 15  اثر انصاری فیض پوری
ڈاکٹر شہباز ملک ہوراں دس پاوندے نیں کہ پنجابی کتابیات جلد دوم وچ مولوی محمد الدین، عبدالمجید، اکٹر، اختر ججہ، غلام مرتضیٰ تے کرنل ڈاکٹر حامد دے قصیدے بردا شریف دے ترجمے کیتے۔
ڈاکٹر سیّدتنویر بخاری ہواراں پہلا پنجابی نعتیہ قصیدہ تخلیق کیتا جیہڑا 1986وچ اقبال زخمی ہوراں دے پنجابی لکھاریاں توں چھپیا۔تنویر بخاری ہوراں دے دو نعتیہ قصیدے ایہدے وچ شامل نیں۔
ڈاکٹر سیّد آفتاب احمد نقوی ہوریں تنویر بخاری ہوراں دے قصیدے ول رخ کرن دی وجہ دسدیاں ہویاں آکھدے نیں:
  ”نعتیہ قصیدے دے پچھانہہ جان دی وجہ دراصل شاعراں دی فنی ریاضت تے محنت دی گھاٹ اے‘
جس نال ساڈے عام شاعر دوچار نیں جدکہ عصری تقاضے وی قصیدے دی گھاٹ ول جان دی وجہ بنے نیں پر تنویر بخاری دے ایہہ نعتیہ قصیدے(حضورﷺ دے حضور)اوہدے فن دی معراج تے فکروں اُچیائی دامنہ بولدا ثبوت نیں۔تنویر بخاری ادب دا سچا، سوہنا تے سلکھنا فنکار اے۔اوہنے قومی ملی تے ادبی حوالے نال نظماں‘غزلاں تے دوجیاں صنفاں وچ ڈھیر سارا ادب تخلیق کیتا اے۔اوہ تخلیق دا سوماتے ادب دا پوتر چشمہ بن کے ابھریا اے۔اوہنے ایہناں قصیاں نوں لکھن ویلے محسوس کیتا اے پئی بھاویں اوہنے اج تیکر بہت کجھ لکھیا اے پر اوہدی پہچان تے وکھراپن نعت دی وجہ نال اے۔ایس حوالے نال اوہدے ایس شعر نوں ویکھو:“
نعت تیری سرمایہ میرا
باقی   سب   ہذیان   محمدﷺ
پہلا قصیدہ ڈاکٹر سیّد تنویر بخاری ہوراں دا تِن سو اک شعراں دا، ایہہ قصید لما تے ہون کرن شاعر دے فہم تے ادراک داکمال اے تے آپ ﷺ ہوراں نال عشق تے محبت دی انتہا دا اظہار اے۔
جس دے آونوں پہلاں سی 
وگّی عرباں تائیں مار
ہر پاسے سی ویر ورودھ
خیریں  کیویں  وسدے  گھار
ڈاکٹر سیّد تنویر بخاری ہوراں عرباں دی حیاتی نوں انج اکھراں وچ نکھیڑیا، انج لگدا اے جیویں تصویراں سامنے نیں،آپ نیں ایہدے وچ عرباں دے رہن سہن دے نقشے وی کچھے تے آپ ﷺ دا دنیا تے تشریف لیاون دا ویلا وی یاد کروایا۔تنویر ہوراں اپنے قصیدے وچ سارے تقاضیاں نوں پورا کیتااے۔
ویکھی انساناں دی کار
رحم آیا مُڑ بندیاں تے
رحمت موڑی فیر مہار
پاک محمدﷺ جس دا ناں 
بھاگاں    والا    تے    مختار
------
کرم کرو ہن میتھے وی
میں وی درشن دا حق دار
میں وی تیرے مکھڑے توں 
ورھدی  ویکھاں  نور  پُھہار
ڈاکٹر سیّد تنویر بخاری ہواراں دا دوجا قصیدہ پہلے قصیدے نالوں لما اے جیہدے وچ آپ مڈھلا مڈھ فریاد توں بندھے نیں جیویں کہ:
وخیتں پھاتھی جان محمدﷺ
کیتا درد حیران محمدﷺ
ہائے ویکھو ہاں! اج کیویں 
سڑدا   پیا   لبنان   محمدﷺ
آپ دے قصیدیاں دے شعراں دی تعداد 800تیکراں اے، تے ڈاکٹر ارشد اقبال ہوریں اخبار ”لوکائی“ وچ لکھدے نیں:
ایہہ گل اگھڑ دی اے پئی بخاری ہوریں قصیدہ لکھن ویلے ایس احساس ہیٹھ سن کہ بھاویں اج تک اوہناں نے بڑا کجھ لکھیا اے پر اوہدی وقعت تے اہمیت کجھ وی نہیں،جتھوں اوہناں نوں ایہہ احساس پنگریا پئی حضور نبی کریمﷺ دی شان وچ قصیدہ نگاری کرنی چاہید ی اے۔
تنویر بخاری ہوراں اپنیاں ایہناں قصیدیاں وچ آپ ﷺ دے حلیہ شریف(یعنی جمال تے فضائل) دوواں نوں ای موضوع متھ کے ایہہ قصیدے تخلیق کیتے نیں۔فیر ایہناں قصیدیاں وچ اوہناں نے اپنے پاک تے پوتر جذبیاں دے وی ہڑھ وگا دتے نیں۔ قصیدیاں دی بحر بڑی مترنم‘رواں تے نغمگی بھری اے جیہدے توں پڑھیار اثر لئیاں بناں نہیں رہ سکدا۔ تنویر بخاری ہوراں دے ایہناں نعتیہ قصیدیاں وچ بڑا ای تنوع اے تے زبان بیان دیاں خوبیاں وی ڈھیر نیں، ایہناں خوبیاں توں وکھ ایہناں قصیدیاں وچ شاعری دے سبھے گن وی موجود نیں تے منظر نگاری دے وی اُچے تے سچے نمونے ملدے نیں۔ تنویربخاری ہوراں نے عرب معاشرت دی تہذیب تے تمدن دیاں تصویراں پیش کرن دے نال نال ایتھوں دے وسیب تے سماج دے چج چالے تے سبھے بھیڑ وی دسے نیں۔اوہناں نے ایہناں قصیدیاں راہیں اپنی زبان دی ارتقائی صورت پیش کردیاں ہویاں ایہناں قصیدیاں نوں کئی نویں لفظ وی دتے نیں۔ کئیاں پرانیاں اکھراں نوں نویں معنیاں دے چولے دی پوائے نیں۔اوہناں دے قصیدیاں دے اک اک شعر وچوں اوہناں دی زبان تے بیان دی سادگی ڈلھ ڈلھ پیندی اے۔ ایہناں دا کوئی لفظ یا شعر اجیہا نہیں جیہدے معنے یامطلب سمجھن وچ کوئی اوکھت یا اوکڑ آرہی ہووے۔مکدی گل ایہہ وے کہ تنویر بخاری ہوراں دے ایہہ نعتیہ قصیدے پنجابی زبان دی نعت دے بھنڈ ار وچ بڑا اچا مقام تے مرتبہ رکھدے نیں تے اوہناں دے ایہناں نعتیہ قصیدیاں دا توڑ پنجابی دے کسے وی نعتیہ شاعر کول نہیں لبھ سکیا پر اوہناں توں بعد پنجابی نعتیہ قصیدے دی اک شاندار روایت ضروری بنی۔ پنجابی دے جہناں شاعراں نے تنویر بخاری ہوراں توں بعد نعتیہ قصیدے تخلیق کیتے اوہناں وچ پروفیسر حفیظ تائب، پروفیسر سید منصور احمد خالد، محمد اقبال نجمی، پروفیسر فیض رسول فیضان،عبدالباسط باسط تے اعزاز احمد آذردے ناں خاص طور تے ذکر جوگ نیں۔