Read more



ایس کتاب دے سارے حق پنجابی کلچرل سنٹر کول نیں
کاپی رائٹ تے کلک کرو تے حقوق پڑھو

------------------------------------------------------------------------
*پاکستان بنن مگروں پنجابی غزلاں دا پہلا مجموعہ*
پاکستان بنن مگروں پنجابی غزلاں دا جیہڑا مجموعہ سب توں پہلاں چھپیا اوہدا ناں ”ولکنیاں“ سی تے جیہدے شاعر سیّد ڈاکٹر تنویر بخاری ہوری نیں۔
”ولکنیاں“توں پہلاں خالص غزلاں دا مجموعہ ”دیوان کشتہ“ دے ناں نال 1903ء وچ چھپیا سی جیہڑا میاں مولابخش کشتہ ہوراں دی تخلیق سی۔ انج ”ولکنیاں“ پنجابی غزلاں دا دوجا مجموعہ سی جیہڑا 1962ء وچ چھپیا۔ تنویر بخاری ہوریں فرماوندے نیں مینوں ایہہ مان نہیں کہ میں غزل دا وڈا شاعر آں، پر مینوں ایہہ اعزاز ضرورحاصل اے کہ پاکستان بنن توں مگروں سب توں پہلاں میریاں غزلاں دا مجموعہ ”ولکنیاں“ چھپ کے سامنے آیا۔
تنویر بخاری ہوریں فرماوندے نیں ایس زمانے وچ میرے توں وڈے پنجابی غزل گو موجود سن۔ جیویں عبدالغنی وفا، علامہ غلام یعقوب انور،ڈاکٹر فقیر محمد فقیر، پیر فضل گجراتی،عبدالمجید بھٹی تے ہور ڈھیر سارے میتھوں عمروں تے فنی قد بتوں وڈے شاعر۔
ولکنیاں:-پنجابی غزلاں دا ایہہ مجموعہ 30*20/16 سائز اتے لیتھو دی کتابت نال، اپریل 1960ء وچ چھپ کے سامنے آیا۔ ایہدے 64صفحے سن۔ کاتب صوفی اسماعیل ہوری سن جیہڑے ”اعظمیہ دارالکتابت“ شیخوپورہ دے مالک تے موضع ورن شیخوپورہ دے رہن والے سن۔ ایہہ مجموعہ آپ نے اپنے پنڈ (کڑیال کلاں ضلع گوجرانوالہ، براہ شیخوپورہ) توں شائع کیتا سی، ایہدا انتساب ”علامہ غلام یعقوب انور(ایڈوکیٹ) ہوراں دے ناں کیتا گیا سی۔ ایس مجموعے وچ کل 36غزلاں سن۔ ایس مجموعے اتے ”ماہ نو“ (کراچی) نے تبصرہ کیتا سی تے علامہ غلام یعقوب انور ہوراں نے اک ”لیکھ اکھراں تے خیالاں دا شاعر ”لکھ کے ماہنامہ“ پنج دریا“ لاہور وچ چھپوایا سی۔
سیّد ڈاکٹر تنویر بخاری ہوراں دا ولکنیاں مجموعہ اتے چھپن ورھا سدھا سادہ درج نہیں سی۔ ایہو ای دسیا گیا سی کہ شاعر نے 23ورھے دی عمر وچ ایہہ مجموعہ چھپوایا۔ تنویر بخاری ہوراں دا جمن ورہا 1939ء اے ایہدے وچ23 جمع کروتاں 1962ء بن دا اے تے انج ثابت ہویا کہ پہلا مجموعہ پاکستان بنن توں بعد سیّد ڈاکٹر تنویر بخاری ہوراں دا اے۔
تنویر بخاری ہوراں دے کجھ شعر جیہڑے ولکنیاں وچ چھپے اوہ حاضر نیں:
ٹٹے آلھنے دے وچ کمبے، جان نیانی ہینی
سڑی سواہ چوں بلدے لمبو، بجلیاں آن پھرولے
(٭)
رشتہ توڑ امیداں نالوں، واندا ہویا دردوں
اپنیاں اتے بیگانیاں اندر، وتھ نہ جاتی رائی
(٭)
کالی چنی پلے بدھے سوہے سوہے صافے
قدم قدم تے کر دیاں راتاں، پربھاتاں دی سوٹ
(٭)
ہتھو گولا دے کے سجنا! ہن لبھنائیں ایتھوں
اکو وگوچا دل سی میرا، دتا پہلی جھاتے
(٭)
کتھوں منگے آس نمانی، ریجھ دی رات ادھاری
دل دا بالک ولک ولک کے منگدا پیار دی چیجی
تحریر : ڈاکٹر ساحر تنویر بخاری (کتاب تنویر بخاری، پی ایچ ڈی لئی)